Ostegunean, maiatzaren 15ean, Balmasedan eta Orozkon jokatuko dira hurrengo kanporaketak. Azken honetan ALBEko Inazio Vidalek kantatuko du, Ander Sarriugarte, Ander Ucelay, Arkaitz Zipitria, Eneko Barruetabeña eta Irune Basagoiti bertsolariekin batera, Idoia Anzorandiaren gidaritzapean. Zorte on! Sarrerak bertsosarrerak.eus webgunean eskuragai.

Dagoeneko iritsi gara Balendin Enbeita bertsopaper lehiaketaren XVI. ediziora. Zeuk nahi duzun gaiari, zeuk nahi duzun bertso moldean, zeuk nahi duzun heldulekutik... adin eta jatorri guztietako bertsozaleen bertso-sortak hartuko ditugu irailaren 30a arte. Urte amaierako ALBE GALA ekitaldian sari bikainak banatuko dizkiegu irabazleei. Gazteontzat aukera aparta! 

Udaberria bertsotan sailkapen fasea ostegun honetan hasiko da, maiatzaren 8an, Bakioko eta Munitibarreko kanporaketekin. ALBEko bi bertsolarik hartuko dute parte: Imanol Uria Albizuri Bakioko kanporaketan lehiatuko da eta June Diaz Francok Munitibarrekoan kantatuko du. Zorte on bioi! Saio biak 18:30ean hasiko dira eta sarrerak bertsosarrerak.eus webgunean erosi daitezke.

Euria ekarri du maiatzaren hasierak, baina hala ere bertso plazak ugariak dira Bizkaia osoan: Eskolatik Plazara, herriko jaietako saioak, txapelketak, sariketak... Hona hemen ALBEko bertsolariak non abestuko duten hil honetan: 

Getxoko bertsolaritza ikasleek plaza erreala dastatzeko aukera izango dute astelehenean, maiatzaren 5ean. Goizeko 10:00etan, Nahikari Ayo irakaslea izango dute gidari, Ane Labaka eta Peio Lago bertsolariak bidelagun direlarik. Aurten lehen aldiz, Portu Zaharreko landan gauzatuko da ekimena, Gure Zirkuko artisten parte hartzearekin. 

 Apirilean sarri euri eta euri egin ohi du, baina eguzki eta bertso plazekin hasi dugu aurten hilabetea. Hona hemen ALBEko bertsolariek non kantatuko duten: