ZAS!ek aurten Bertso Jaialdia antolatuko du Basaurin azaroaren 10ean, igandea. Zurrumurruen aurkako bertso jaialdi honetan Andoni Egaña, Maialen Lujambio, Amets Arzallus, Igor Elortza, Miren Artetxe, Aitor Mendilkuze eta Miren Amuriza arituko dira kantuan Basauriko Social Antzokian, iluntzeko 18:00etan.
Arestian iragarri bezala, Bizkaiko Bertsozale Elkarteak bertso epailetzaren inguruko ikastaro trinkoa eratu dau Bilbon, datorren zapatuan hasita. Joseba Santxo, Mirari Azula eta Iñaki Aurrekoetxea izango dira gidariak, eta ikusita jendearen interesa, antolatzaileek epea luzatzea erabaki dute.
Urria eta maiatza bitartean, Onintza Enbeitak gidatutako saioetara joanez bertsogintzari buruzko klase osagarriak hartzeko aukera izango dute 17 eta 23 bitarteko gazteek. Urriaren 16a arte dago irekita izena emateko epea.
Pasa den asteburuan, urriaren 5ean, HASTA LA 2TORIA eta KONTRABANDA taldeak aurrez aurre aritu ziren kantuan. Saio borobila izan zen, umorez betea baina gai serioagoak ere ukituz. Bi taldeak fin-fin ibili ziren arren, gauaren amaieran HASTA LA 2TORIA izendatu zuten garaile. Aurreko saioa ere irabazi zutenez, Taldekako Xilabako finalerdietara klasifikatu den lehen taldea da HASTA LA 2TORIA.
Aste honetan Taldekako Xilaba Txapelketaren bi saio egingo dira. Urriaren 11n ESKUKULA eta 4KOPLASARA taldeek kantatuko dute Amenduzen eta 12an EKAINAZ eta KONTRABANDA taldeak, Azkainen.