Otsailetik maiatzera Uribe Kostan egingo diren bertso ekitaldien berri bertsozaleei ematea da agenda honen helburu nagusia. Ikusiko duzuenez, lauhileko bete-betea dator, bertsoari dagokionez. Bat egin gurekin eta parte hartu bertsozaleon interes eta atseginerako prestatu ditugun ekimenetan. Baina lehenik eta bat, gorde datak zuen egutegietan!

Urte berria, asmo berriak... baina Ase Bertsoz indartsu jarraitzen du! Ostegunean, 20:00etan, Azebarrin bilduko gara 2022ko lehen Ase Bertsoz ekimena ospatzeko. Zatozte, bertsolari eta bertsozaleok, urte berrirako proiektuez kantatzera! 

2022 urtea hasi berri da eta, pixkanaka-pixkanaka, martxa hartzen ari dira ALBEko bertsolariak...

Bihar, abenduaren 24an, Olentzero eta Mari Domingiren etorrerarekin lotutako hainbat ekintza egongo dira egunean zehar eskoletako plazan, Berantzagi dantza taldeak antolatuta. Horien artean, 13:00etan kantuan izango ditugu aurten BBK sariketa irabazi duten Maialen Lago, Peio Lago, Jare Torralba eta June Diaz ALBEko bertsolari gazteak. Hurbildu zaitezte!

Hurrengo ostegunean, abenduaren 30ean, Onintza Enbeita eta Unai Mendiburu bertsolariak izango ditugu Erandion kantuan. 19:30etan, La plaza tabernatik hasiko da jira eta Erandioko hainbat tabernetatik pasako dira, Kulunka taldearen musikarekin lagunduta. 

2021a bertso urte gogoangarria izan da gurean. Eskolak bertso agenda potentea burutu du, eskualde osoko plazak bertsozale gogotsuz betez. Bestetik, eskolak arazo barik eman dira maila guztietan, eta gazteek BBKko txapela ere ekarri dute. Eta Jonek ginga ipini dio tartari, Bizkaiko Bertsolari Txapelketako buruz burukoan sartuta, eta final itzela jokatuta. ZORIONAK DENOI ETA BERTSO URTE BERRI ON!!!