Jone Uria, ALBEko kidea, 4. gelditu da, saio bikaina eginda. Denak oso parean ibili ondoren Onintza Enbeitak irabazi zuen txapela. ZORIONAK! Larunbatean jokatu zen BBTko finala eta Maite Berriozabalek gidatuta, oholtzan aritu ziren Xabat Galletebeitia, Onintza Enbeita, Nerea Ibarzabal, Etxahun Lekue, Aitor Bizkarra, Jone Uria, Miren Amuriza eta Eneko Abasolo "Abarkas".

Abenduaren 22an (larunbata), arratsaldeko 7etan Getxoko Igeretxe jatetxean. Aurten, Imanol LAZKANO bertsolari ezagunari URREZKO AHOBIA emango diogu bere ibilbide luze eta oparoagatik. Sari-emateaz gain, beste hainbat osagai izango ditu ekitaldiak, horien artean bertsosaio oso erakargarri bat: Maialen Lujanbio, Andoni Egaña, Jone Uria eta Sebastian Lizaso. Amaitzeko, Kupela taldearen kontzertua eta kopaua zerbitzatuko da.

Igandean Lekeition jokatutako finalaurrekoan erabaki zen 2018ko Bizkaiko Bertsolari Txapelketako finaleko zortzikotea: Miren Amuriza, Nerea Ibarzabal, Jone Uria, Xabat Galletebeitia, Etxahun Lekue, Onintza Enbeita, Eneko Abasolo "Abarkas" eta Aitor Bizkarra. Zorionak!

ALBEko Jone Uriak saioa irabazi eta finalerako txartela zuzenean lortu zuen, Arrate Illarok ordea seigarren egin zuen, atzo Lekeition jokatutako Bizkaiko Bertsolari Txapelketako azken finalaurrekoan. Santi Brouard kiroldegian eta Amaia Ugaldek gidatuta, oholtza gainean aritu ziren Ander Elortegi, Arrate Illaro, Etxahun Lekue, Ibon Ajuriagojeaskoa, Jone Uria eta Txaber Altube.

Hogeita hamazortzi urtez bertsogintzaren hazia eta euskararen argia Getxon eta Uribe Kostan ereiten jardun ostean, Getxoko Udalak, euskararako batzordearen proposamenez, aurtengo ARGIA EREITEN saria ALBEri eman dio. Eskerrik asko guzti-guztioi, eta sari honek eman diezagula bide beretik urte askoan jarraitzeko adorea!

Urteari amaiera borobila emateko bertso jirak antolatu ditugu: Abenduaren 2an Sopelan Aitor Mendiluze eta Julio Soto izango dira Oxabiren lagunekin batera eta 28an Erandion Andoni Egaña eta Imanol Uria Kulunkan taldearekin.