Urteetan zehar egin izan dugun moduan, aurten ere, 2017an, ez zen bertsorik falta izan Algortako sanjuanadan. Arratsaldeko zortziak aldera, eta sua oraindik piztu gabe zegoelarik, hasi ziren kantuan ALBEko gazteak, Paule Loizaga, Unai Mendiburu, Kerman Diaz, Irene Ezkurra, Naroa Torralba eta Maddalen Ruesgas, Joseba Santxo gidari zutelarik.
Ekainaren 16ko Balkoitik balkoira saio bereziak eman zion hasiera Uribe-kostako udako bertso-denboraldiari.
Saioaren hasiera gaueko hamarretarako iragarrita bazegoen ere, eguraldia aprobetxatuz jende andana bertaratu zen ordua iritsi baino dexente lehenago Arrantzale plazara; tabernetako terrazetan eseri eta trago batekin ordua noiz iritsiko zain.
2017ko maiatzaren 5ean, Mexiko izan genuen bisitari berezi Algortako Ekin tabernan bildu ginen bertsozale guztiok. Eguna iluntzen hastearekin batera hasi ziren agertzen lehenengo pontxo, txirikorda zein kapela mexikarrak, pixkanaka-pixkanaka giroa berotuz. Eta bertso-afari mexikar bat girotzeko, zer hoberik bertatik ekarritako musikari zoragarri batzuk baino? Mariatxien rantxerak, inguruko apaingarriak, temperatura altua… momentu batez denok sinistu genuen Tijuanan geundela! Sentsazio hori areagotu zen natxoz beteriko platerak mahaietara heldu zirenean, luxuzko afari bati hasiera emanez.
ABRAko golkoak ere nabaritu zuen mikro eta mahai bueltan sortu zen giro ederra. Otsailaren 17an jokatu zen bertsolari gazteen XVI. Abra Saria. Aurtengoa leku berezi batean, Ereagan dagoen La Ola jatetxean, hondartzaren gainean eta itsasoaren parean. Bertsozalez mukuru bete zen gela, bertso artean igeri egin eta bustitzeko asmoz. Hala, urtero legez, arratsalde-iluntze pasa eder batez gozatzeko aukera izan zuen bakoitzak.
Oles ta oles oletan,
nor dabil ordu honetan?
Bertsozaleok alkar hartuta
baztarrak inkomodetan.
2017 urteari, hasiera ezin hobea eman ahal izan genion Albekide askok! Izan ere, Urtarrilaren 3tik 5era bitartean, orain bi urte egin genuen bezala, Elgoibarko Aubixa Aterpetxera joan ginen eskolaren parte garen 44 ume eta gazte. Ikasturte hasieran, ume eta gazte guztien familiei jakinarazi zitzaien bezala, aurten nahiz eta ez garen denok Aldai Patronatuan ibiliko kantuan, denok ALBEkide garen aldetik, bertso talde ezberdinen arteko harremanak sortu eta estutu nahi genituen. Adin, ikastetxe ezberdinetan arituko bagara ere, denok bat garela sentitu eta sentiarazi nahi genuelako. Eta halaxe izan zen.